వేల కోట్ల పెట్టుబడులు.. వేల ఉద్యోగావకాశాలు
వివిధ కంపెనీలతో ప్రభుత్వం ఎంవోయూలు
దిగ్విజయంగా ముగిసిన కె.టి.ఆర్‌. పర్యటన
తెలంగాణ ఏర్పడితే ఐటీ పరిశ్రమలు ఎగిరిపోతుందని విష ప్రచారం చేసిన దుష్టశక్తులకు దీటైన సమాధానం చెప్పింది ఐటీ మంత్రి కేటీ రామారావు అమెరికా పర్యటన. అమెరికాపై కాలు మోపింది మొదలు.. ఐటీ, పారిశ్రామికరంగాల్లోని ఆయా దిగ్గజ కంపెనీల సీఈవోలు, ఉన్నతాధికారులను కలుస్తూ బిజీబిజీగా గడిపిన కేటీఆర్‌.. తన రెండు వారాల పర్యటనను దిగ్విజయంగా ముగించుకున్నారు. హైదరాబాద్‌లో పెట్టుబడులు పెట్టేందుకు వీలైనన్ని ఎక్కువ సంస్థలను ఒప్పించాలన్న దృఢ సంకల్పంతో వెళ్లిన ఆయన ఆ ప్రయత్నంలో సఫలీకృతులయ్యారు.
మంత్రి కెటిఆర్‌ పర్యటనలో పలు కంపెనీల అధిపతులను కలిశారు. కొన్ని వేల కోట్ల పెట్టుబడులు, తద్వారా కొన్ని వేల మందికి ఉపాధి అవకాశాలు కల్పించేలా అనేక ఎంవోయూలను కుదుర్చుకున్నారు.
హైదరాబాద్‌ భౌగోళిక ప్రత్యేకతలు మొదలుకుని ఐటీ, ఐటీఈఎస్‌, ఏరోస్పేస్‌, ఫార్మారంగాల్లో ఇప్పటికే హైదరాబాద్‌కు ఉన్న ప్రఖ్యాతిని వివరిస్తూ, ప్రభుత్వం కొత్తగా ప్రతిష్ఠాత్మకంగా రూపొందించిన పారిశ్రామిక విధానాన్ని పరిచయం చేస్తూ అమెరికా కంపెనీల మనసుదోచుకునేలా పర్యటన సాగింది.
ప్రపంచ ప్రఖ్యాత ఈ-కామర్స్‌ సంస్థ అమెజాన్‌ ప్రతినిధులతో భేటీ అయిన కేటీఆర్‌.. అనంతరం సియాటెల్‌ చాంబర్‌ ఆఫ్‌ కామర్స్‌ ఎగ్జిక్యూటివ్‌ వైస్‌ ప్రెసిడెంట్‌ ఎరిక్‌ స్కిన్‌ఫెల్డ్‌తో కూడా సమావేశమయ్యారు. అంతకు ముందు ప్రపంచ ప్రఖ్యాత సాఫ్ట్‌వేర్‌ సంస్థ మైక్రోసాఫ్ట్‌ అధినేత సత్య నాదెళ్లను కలిశారు.
హైదరాబాద్‌ మా హాట్‌ ఫేవరెట్‌..
హైదరాబాద్‌ ఎప్పటికీ తమ హాట్‌ ఫేవరెట్‌ అని పలు ఐటీ, పారిశ్రామిక సంస్థలు తేల్చి చెప్పాయి. ప్రపంచ ప్రఖ్యాత గూగుల్‌ మొదటిసారి అమెరికా బయట నిర్మించబోయే తమ అతిపెద్ద కార్యాలయానికి హైదరాబాద్‌ నగరాన్ని ఎంచుకుంది.
హైదరాబాద్‌లో ఇప్పటికే పని చేస్తున్న మైక్రోసాఫ్ట్‌ కంపెనీని మరింతగా విస్తరించేందుకున్న అవకాశాలు పరిశీలిస్తామని ఆ సంస్థ సీఈవో సత్యనాదెళ్ల మంత్రి కేటీఆర్‌కు హామీ ఇచ్చారు.
డాటా అనలిటిక్స్‌లో 30ఏండ్ల అనుభవం కలిగిన ఇన్‌ రిథమ్‌ కంపెనీ తెలంగాణ ప్రభుత్వంతో ఒప్పందం కుదుర్చుకుంది. నగరంలోని డాటా సెంటర్లకి ఉన్న రక్షణపట్ల ముగ్ధుడైన ఒరాకిల్‌ సీఈవో మార్క్‌హర్డ్‌..
హైదరాబాద్‌లో పెట్టుబడులకు అసక్తి ప్రదర్శించారు. తాను పక్కా హైదరాబాదీనని చెప్పిన అడోబ్‌ సిస్టమ్స్‌ సీఈవో శంతను నారాయణ్‌.. హైదరాబాద్‌కోసం కచ్చితంగా సహకారం అందజేస్తానని మంత్రికి హామీ ఇచ్చారు.ప్రత్యామ్నాయ ఇంధన వనరుల విభాగంలో ప్రఖ్యాత బ్లూమ్‌ ఎనర్జీ సీఈవో కేఆర్‌ శ్రీధర్‌ త్వరలోనే హైదరాబాద్‌ వస్తానని హామీ ఇచ్చారు. సిలికాన్‌ వ్యాలీలో నాస్కాం నేతృత్వంలో ఏర్పాటుచేసిన ఇన్నోట్రెక్‌ సమావేశంలో కేటీఆర్‌ ప్రసంగానికి ముగ్ధులైన పారిశ్రామికవేత్తలు, ఐటీ నిపుణులు తెలంగాణ స్టార్టప్‌లకు సిలికాన్‌ వ్యాలీలో చోటు కల్పిస్తామని చెప్పారు.
పెట్టుబడులకు సిద్ధమన్న బోయింగ్‌
వైమానిక రంగంలో పేరెన్నికగన్న బోయింగ్‌ కంపెనీ అధ్యక్షుడు మార్క్‌ అలెన్‌ తమ కంపెనీ విస్తరణకు త్వరలోనే తెలంగాణకు తమ సంస్థ సీనియర్‌ ప్రతినిధులను పంపించనున్నట్లు కేటీఆర్‌కు తెలిపారు. హెచ్‌పీ ప్రింటర్ల తయారీ కేంద్రాన్ని హైదరాబాద్‌లో ఏర్పాటుచేసేందుకు ఐటీ దిగ్గజం హ్యులెట్‌ ప్యాకర్డ్‌(హెచ్‌పీ) వైస్‌ ప్రెసిడెంట్‌ సుపర్ణో బెనర్జీ అంగీకరించారు. ప్రముఖ ఐటీ, పెట్టుబడుల సంస్థ డీఈ షా ఎండీ ఎరిక్‌ వెప్‌సిక్‌ మరో కంపెనీ బ్లాక్‌స్టోన్‌ అసెట్‌ మేనేజ్‌మెంట్‌తో కలిసి హైదరాబాద్‌లో రూ.1274 కోట్లు పెట్టుబడి పెట్టేందుకు సిద్ధంగా ఉన్నట్లు ప్రకటించింది.
సైబర్‌ సెక్యూరిటీ రంగంలో పలు ప్రైవేటు సంస్థలను కలుపుకొని తెలంగాణ ప్రభుత్వంతో కలిసి పనిచేసేందుకు సిద్ధంగా ఉన్నామని మాస్టర్‌ కార్డ్‌ అధ్యక్షుడు అజయ్‌ బంగా తెలిపారు. హైదరాబాద్‌లో జరిగే గ్లోబల్‌ ఇన్వెస్ట్‌మెంట్‌ సమ్మిట్‌కు నాలెడ్జ్‌ పార్ట్‌నర్‌గా వ్యవహరించేందుకు ప్రముఖ ఆర్థిక సేవల సంస్థ కేపీఎంజీ చైర్మన్‌ జాన్‌వేప్‌ా మేయర్‌ అంగీకరించారు.
ప్రఖ్యాత వెంచర్‌ క్యాపిటల్‌ సంస్థ న్యూ ఎంటర్‌ప్రైజ్‌ అసోసియేట్స్‌తో కేటీఆర్‌ సమావేశమై హైదరాబాద్‌ కంపెనీలకు ప్రోత్సాహం అందించాలని కోరారు. సన్‌ మైక్రో సిస్టమ్స్‌ కో ఫౌండర్‌ వినో ద్‌ కోస్లా, జనరల్‌ ఎలక్రికల్స్‌ సంస్థ మాజీ చైర్మన్‌, సీఈవో జాక్‌ వెల్స్‌తో మంత్రి సమావేశమయ్యారు.
వాషింగ్టన్‌ డీసీ ఎన్నారైలు మిషన్‌ కాకతీయకు 50,000 డాలర్ల విరాళాన్ని, డల్లాస్‌ ఎన్నారైలు 2లక్షల డాలర్లను వాటర్‌ గ్రిడ్‌, మిషన్‌ కాకతీయకు విరాళంగా ఇచ్చేందుకు ముందుకువచ్చారు.
తెలంగాణలో పాలన భేష్‌ : అమెజాన్‌
తెలంగాణ ప్రభుత్వ చురుకైన పాలన పద్ధతులను అనుసరిస్తున్నదంటూ ప్రముఖ అమెరికా ఈ కామర్స్‌ సంస్థ అమెజాన్‌ అభినందించింది. అమెరికా పర్యటనలో ఉన్న ఐటీ, పంచాయతీరాజ్‌ శాఖ మంత్రి కే తారకరామారావు సియాటెల్‌లోని అమెజాన్‌ క్యాంపస్‌ను సందర్శించారు. అమెజాన్‌ పబ్లిక్‌ పాలసీ ఉపాధ్యక్షుడు మోనిక్‌ మెకీ, ఆ సంస్థ డైరెక్టర్‌ జాన్‌ స్కాట్లర్‌లను మంత్రి కలిశారు.
ఈ సందర్భంగా వారు మాట్లాడుతూ తెలంగాణ ప్రభుత్వంతో తమ అనుబంధాన్ని కొనసాగిస్తామని హామీ ఇచ్చారు. అనంతరం సియాటెల్‌ చాంబర్‌ ఆఫ్‌ కామర్స్‌ ఎగ్జిక్యూటివ్‌ వైస్‌ ప్రెసిడెంట్‌ ఎరిక్‌ స్కిన్‌ఫెల్డ్‌తో కూడా మంత్రి కేటీఆర్‌ సమావేశమయ్యారు.
